الخميس، 1 مايو، 2008

حكاية قميص صينى

انا كنت توب قماش واحنا اتواب على كل لون يابتسطا.... سحبنى مقصدار صينى انما ايه ولد دقرم وبالمقص الكهربائى حولنا لاجزاء قمصان . خدت مكوناتى بنت صينية عينيها ضيقة , قصيرة لكن اديها تتلف بحرير وبدأت تدرزنى على ماكينة حديثة جدا مفيش فيها مجال للغلط . فى نفس الوقت كانت ياقتى بتتكبس فى مكبس . تعالوا نشوف مكوناتى ايه وسعرى هايكون ايه . بعد ما اتجمعت اجزائى ركبولى 12 زرار واتنين زرار احتياطى فوق البيعة . حطوا فى قفايا تيكيت مكتوب عليه هنج بنج فنج وجنب التكت مقاسى وفى الجنب ارشادات ازاى تغسلونى , ورا الياقة كرتونة وحوالين الياقة شريط بلاستيك وفراشة بلاستيك تحت الياقة و فى ظهرى كرتونة ضهر وقدامها ورقة زبدة ودبسونى ب12 دبوس مابيصديش . كيسونى فى كيس سلوفان بلاصق ذاتى وحطونى فى علبة كرتون لها شباك سولوفان اقدر اشوفكم منه وتشفونى كمان . جت بنت صينية حطتنى فى صندوق انا وزملائى اتكرتنت يعنى اتحطيت فى كرتونة وقفلوها . من برة كتبوا على الكرتونة احنا مين ورايحين فين خرجنا من المصنع دخلونا كونتينر ومن البلد الى انا فيها قطعنا مشوار طويل لغاية المينا عرفنا من هناك ان احنا رايحين بلد اسمها بورسعيد بعيد جدا عن الصين شحنونا على المركب وايام وليال لغاية ما وصلنا البلد دى . هناك فرغونا من المركب وعلى عربية لغاية الجمرك . دفعوا علينا رسوم واستلمنا الى اشترانا وحطنا فى مخزن وبدأ يسلمنا لتاجر جملة لتاجر تجزئة لغاية ما وصلنا لولد بكرتونة علشان يبيعنا ب12 جنية . طيب صاحب المصنع الصينى كسبان واللى استوردنا كسبان وتاجر الجملة كسبان وتاجر التجزئة كسبان والولد ابوكرتونة كسبان . الى استوردنا ماهو دافع تفريغ ونقل ورسوم منطقة حرة ودافع نقل من الجمرك لمخزنه . نسيت اقوللكم ان الرجل الصينى دافع للمقصدار ودافع للبنات الصينيات ودافع ثمن قماش ومكوناتى ودافع كهربا ودافع ضرايب ودافع تأمينات ودافع نقل داخلى ونولون بحرى وكسبان .
زمان قالو لنا اطلب العلم ولو فى الصين .. مارحناش .. لكن الصين هى الى جت لنا ........جتنا نيلة فى حظنا الهباب

هناك 3 تعليقات:

Naglaa يقول...

حطيت ايدك على طمع الطامعين, مشكلة قلة أخلاق وايثار وطمع
نجلاء الزحلاوى

•√أريـ السمر ـج√• يقول...

مقالة جميلة جدا
للاسف دلوقتى بنطلب الفوانيس و لو من الصين.. اي تاجر دلوقتي بيسافر الصين يتفسح و يستورد اللى عايزه و يكسب كمان يبقى ح يفكر ليه يعمل هنا مصنع و لا حتى ورشة .. بس صحيح ال 12 جنيه كفت كل دول ازاى امر بيحيرني كتير و الله
أسعدني المرور
دمت بكل الخير

Uouo Uo يقول...



thx

شركه تنظيف