الخميس، 1 مايو، 2008

حكاية قميص صينى

انا كنت توب قماش واحنا اتواب على كل لون يابتسطا.... سحبنى مقصدار صينى انما ايه ولد دقرم وبالمقص الكهربائى حولنا لاجزاء قمصان . خدت مكوناتى بنت صينية عينيها ضيقة , قصيرة لكن اديها تتلف بحرير وبدأت تدرزنى على ماكينة حديثة جدا مفيش فيها مجال للغلط . فى نفس الوقت كانت ياقتى بتتكبس فى مكبس . تعالوا نشوف مكوناتى ايه وسعرى هايكون ايه . بعد ما اتجمعت اجزائى ركبولى 12 زرار واتنين زرار احتياطى فوق البيعة . حطوا فى قفايا تيكيت مكتوب عليه هنج بنج فنج وجنب التكت مقاسى وفى الجنب ارشادات ازاى تغسلونى , ورا الياقة كرتونة وحوالين الياقة شريط بلاستيك وفراشة بلاستيك تحت الياقة و فى ظهرى كرتونة ضهر وقدامها ورقة زبدة ودبسونى ب12 دبوس مابيصديش . كيسونى فى كيس سلوفان بلاصق ذاتى وحطونى فى علبة كرتون لها شباك سولوفان اقدر اشوفكم منه وتشفونى كمان . جت بنت صينية حطتنى فى صندوق انا وزملائى اتكرتنت يعنى اتحطيت فى كرتونة وقفلوها . من برة كتبوا على الكرتونة احنا مين ورايحين فين خرجنا من المصنع دخلونا كونتينر ومن البلد الى انا فيها قطعنا مشوار طويل لغاية المينا عرفنا من هناك ان احنا رايحين بلد اسمها بورسعيد بعيد جدا عن الصين شحنونا على المركب وايام وليال لغاية ما وصلنا البلد دى . هناك فرغونا من المركب وعلى عربية لغاية الجمرك . دفعوا علينا رسوم واستلمنا الى اشترانا وحطنا فى مخزن وبدأ يسلمنا لتاجر جملة لتاجر تجزئة لغاية ما وصلنا لولد بكرتونة علشان يبيعنا ب12 جنية . طيب صاحب المصنع الصينى كسبان واللى استوردنا كسبان وتاجر الجملة كسبان وتاجر التجزئة كسبان والولد ابوكرتونة كسبان . الى استوردنا ماهو دافع تفريغ ونقل ورسوم منطقة حرة ودافع نقل من الجمرك لمخزنه . نسيت اقوللكم ان الرجل الصينى دافع للمقصدار ودافع للبنات الصينيات ودافع ثمن قماش ومكوناتى ودافع كهربا ودافع ضرايب ودافع تأمينات ودافع نقل داخلى ونولون بحرى وكسبان .
زمان قالو لنا اطلب العلم ولو فى الصين .. مارحناش .. لكن الصين هى الى جت لنا ........جتنا نيلة فى حظنا الهباب

السبت، 26 أبريل، 2008

الحزن لعبتنا

لدينا قدرة غريبة على الحزن و البكاء و الكآبة و العويل و لا قدرة لنا على الفرح و النصر و الابتهاج و لدينا مجموعة كبيرة من الشماعات لتعليق اسباب الهزائم و الاخفاقات فى السياسة , الاقتصاد ,الحروب و الرياضة و كل شىء .فدائما للهزيمة اى هزيمة الف سبب و سبب و الهزائم دائما بسبب عوامل خارجية كما نتوهم و ليست بأيدينا نحن فى حرب فلسطين كانت الاسلحة الفاسدة هى السبب فى 56 كانت الامبرالية الغاشمة (فاهم حاجة)ثم حولناها لنصر ازاى معرفش ! فى 67 كان السبب سهرة او بارتى فى انشاص و السبب الثاني "ذلك العدو الغادر الذى كنا ننتظره من الشرق فجاء من الغرب ." قال يعنى كان لازم يبعث لنا برقية او فاكس او تلكس يقول لنا جاى منين .الفرحة الوحيدة كانت فى 1973 لكن لاننا عالم نكدية لم تدم الفرحة طويلا بل كانت قصيرة جدا و بسرعة تم اغتيال صاحب النصر و صاحب الفرحة بعد 6 سنين فقط كأننا نقول له "فرحتنا ليه يا منيل" .فى الكورة فاكر كويس ان احد اسباب هزايمنا فى اثيوبيا ان الامبراطور هيلاسيلاسي حضر الماتش و معاه اسدين سببوا الرعب فى قلوب لاعبينا لكن الحقيقة كنا هانكسب بس الموضوع فيه اسود . صفر المونديال بكينا و كتبنا كتير و العيب مش فينا احنا زى الفل بس عم بلاتر راجل مرتشى و كان عايز مش عارف كام مليون .و فى صفر الجامعات قلنا ان الجهة اللى طلعت البيان ليست جهة رسمية ,و بكرة نطلع نتائج تحقيقات العبارة ان السبب سبرتاية كانت مع راكب غلبان صعيدى حب يعمل كباية شاى غامق فكانت الكارثة .و اذا كانت السبرتاية سرها باتع و اقوي من اسلحة الدمار الشامل ما تيجى نحط كام سبرتاية فى الاسطول السادس الامريكي و نرتاح من قرفه . احنا مش بتوع فرح الميت يعملوا له 3 خمسان يعنى خميس اول و تانى و ثالث و خميس رابع اسمه الخميس البطال و اربعين و سنوية و وراها سنوية و لمزيد من الحزن للغير قادر على الحزن و العويل و النحيب و البكاء نلجاء الى مجموعة من النسوان الندابين و المعدداتية لتعدد امام الميت كم كانت مزاياه ,كان جنرال و مفكر و اديب و سياسي ,و هو امي يدوب معاه شهادة التطعيم ضد الجدرى .و بكره نطبق نظرية المؤامرة على انفلوانزة الطيور ليعلن احد نواب الحزب الحاكم فى مجلس الشعب البيان التالى "لقد اندست و اخترقت حدودنا الشمالية مجموعة اثمة من طيور البشاروش و الشرشير و الغر و الحمراي و قامت بالقاء حمولتها من الزريق و النفايات فوق ارضنا الباسلة و كان ما كان " و فيه كلام كثير عن اللتهاب الكبدي الوبائي , و الحمى القلاعية, تزوير الانتخابات , الاخوان المسلمين , الرسوم المسيئة للرسول(ص),التعليم , التلوث , الفساد , قتل سفير و خطف سفير اخر .
انا تعبان و عايز ارتاح شوية .
مش عارف ليه الفرح سحابة صيف تمر بسرعة... الحزن كاتم على انفاسنا و انفاسا اللى خلفونا

تيجى نلعب قمار حلال
اذا كنت من الميسورين لا داعي للسفر الي لاس فيجاس و لا داعي لكازينو مونت كارلو الشهير اما ان كنت من المستورين وتحلم في ان تكون من الميسورين يعنى معدي روح اسحب فلوسك و مدخراتك من البنوك فوائد بنوك ايه يا معفن روح بيع البيت اللى انت ساكن فيه بيع مجوهرات مراتك او اقترض بضمانها بيع حته الارض اللى سابهالك ابوك وتعالى نلعب فى اكبر كازينو قمار فى العالم تعالوا نلعب فى البورصه هكذا يقنعك الشاب النصاب الذى يعمل فى احدي شركات السمسره انه وضع بيل جيتس على الطريق الصحيح وبعد ان كان يملك يدوب تلاته دولار اصبح يملك امبراطوريه مايكروسوفت وعلشان يلبسك الطاسه مضبوط يقنعك ان مستر شين بنج شكوكو صاحب ميتسوبيشى اليابان عمل بنصيحته واصبح سبحان العاطى الرزاق هذا النصاب يعرف كيف يقنعك باهدار ما تملك وانت تبتسم يفقدك عقلك قبل ان يفقدك مالك و لن تستطيع ان تقاضيه او ان تبلغ عنه الانتربول لان القانون لا يحمى المغفلين اللى زيك
اللعبه الاولى
عبده بيه كفته رجل اعمال كبير شركاته مسيطره على البورصه يشترى كميه رهيبه من الاسهم لايجاد طلب عليهاو اجهزه الاعلام تطبل و تهلله السهم يطلع فى العلالى وفى الوقت المناسب يبيع عبده بيه كفته كميات هائله من اسهمه هذه اللعبه تؤدى الى انهيار سعر السهم وعند حد معين يقوم كفته بيه بالشراء طبعا برخص التراب ويكرر المحروس اللعبه الشيطانيه من جديد و بذلك تنقل مليارات الجنيهات من جيوب الكادحين الى جيبه من جديد
اللعبه الثانيه
يظهر مسيو جان موروستان احد رجال الاعمال الهاربين منذ سنوات الى الخارج فى احدى الفضائيات وهو يبكى و يعلن ان مصر الحبيبه وحشته جدا و انه ناوى يسوى مديونياته و يعود قبل ظهوره فى التليفزيون كان سعر سهم شركاته فى مصر تلاته تعريفه و بعد ظهوره يرتفع سهمه جنيهات الكل يبيع ثم يظهر فى فضائيه اخرى ليعلن وحياة مامى كان نفسى ارجع بس كاوتش الطياره نايم فينهار سعر السهم الى تلاته تعريفه فيعود الشراء بالسعر الزهيد انتظارا لظهوره مرة اخرى فى التلفزيون وتتكرر اللعبه من جديد
تحذير هام
يا مواطن اذا سمعت كلام الشاب الوسيم بتاع شركه السمسره ستصاب بازمات قلبيه وانسداد رئوى و نزيف فى المخ و حالة عته ابدى و ستترك ذكرى عطره انك كنت مغفل كبيييييييييييييييييييييييييييير

الأربعاء، 23 أبريل، 2008